دین و ژیان لێرە

هێمن میرانی

کە لە کوردستان بووم، بە هۆی ئەو برادەرانەی لە ئەوروپا گەڕابوونەوە یان بە هۆی نوسینی هەندێ هاوڕێی سیکیۆلار، وا دەهاتە بەر چاو کە لە ئەوروپا هەر باسی دین بکەی تێر شەقت دەکەن یان دین شتێکی بێزراو و بێ نرخ و پوچە لە ژیانی خەڵک، ئەم دیدە لایەنی کەم بۆ ئەو خەڵکەی کەم خوێنەر بوو یان بە ئاگایی تەواوەوە زانیاری لەسەر دونیای دەرەوە نەبوو وەکو راستی لێ هاتبوو. کەچی دۆخەکە بەو جۆرە بێزراو نیە کە لە دوورەوە سەیر دەکرێ. لە وڵاتێکی وەکو بەریتانیا ئازادی پەیڕەوکردنی بنەما و ئەرکە ئایینیەکان بۆ هەموان دابین کراوە ( مزگەوت و کلێسا دراوسێی بێ کێشەن) و باوەڕ نەبوونیش بە هیچ ئاینێک کارێکی ئاسایی و بێ کێشەیە، هەر کەسە و لە چوارچێوەیەک کە رێز و تایبەتمەندی ئەوانی دیکە پێشێل نەکا لە گەڵ بیروباوەڕەکانی خۆی دەژی. ئەوەی سەیر بوو بە لای من ئەو دۆخەیە کە لە قوتابخانەکان لە بۆنەکانی ساڵیادی لە دایک بوونی حەزرەتی مەسیح بینیمان. بایەخێکی یەکجار گەورە لە قوتابخانەکان بەم بۆنەیە دەدرێ. منداڵەکانی من، هەستی لە قوتابخانە و هێلان لە باخچەی منداڵان دێنەوە و هەر باسی جیسس و مێری ( عیسا و مەریەم ) دەکەن. هەستی سەرەتا هاتەوە گوتی بابە دەزانی جیسس کێیە؟ ئەمنیش لۆم باس کرد، گوتی نا ئەوان دەرێن جیسس کوڕی خوایە. جا وەرە ئەوەی لۆ روون بکەرەوەو تێی بگەیەنە کە وا نیە.

هەروەها هێلان گۆرانی مێری و بەیبی دەڵێ. ئەمانە کۆتایی مانگی دیسەمبەریان بۆ ئەو دۆخە تەرخان کردبوو. بە چیڕۆک، شانۆگەری، وێنە، گۆرانی و چەندین جۆری دیکەی جیسس و مێریان بە تێگەیشتن و باوەڕی خۆیان بە منداڵان ناساندووە لە کاتێک قوتابخانەکان سەر بە دەوڵەتن و سیستمیش سیکۆلارە. ئەوان وەکو بەشێک لە کولتور و ئەخلاقی کۆمەڵایەتی سەیری دین دەکەن، نەک وەکو بەڵا وەکو ئەوەی هەندێ برادەر لە دوورەوە وێنای دەکەن. راستە دین و ئەرکە دینیەکان بە تەواوی لە ژیانی کۆمەڵایەتی بە تایبەت لە نێو نەوەی نوێ فەرامۆش کراوە، بەڵام لە قوتابخانەکان هێشتا منداڵان بە تێگەیشتنی کریستیانیتی بۆ ژیان بە شێوەی جۆراو جۆر پەروەردە دەکرێن.

یاده‌وه‌رییه‌كانى ئینگلستان

غه‌رامه‌ به‌ سوپاسه‌وه‌

هێمن میرانى

له‌م به‌ریتانیایه‌ یه‌كێك له‌ دیارده‌ هه‌ره‌ به‌رچاوه‌كان كه‌ خه‌ڵكى غه‌ریبه‌ زوو دركى پێ ده‌كا سزاى داراییه‌ Fine. ئه‌مه‌ له‌ پاڵ گه‌شه‌كردنى كۆمه‌ڵگه‌ بۆته‌ یه‌كێك له‌ هۆكاره‌ هه‌ره‌ گرنگه‌كانى كه‌مبوونه‌وه‌ى تاوان و سه‌رپێچى و به‌رێوه‌چوونى ژیان به‌ ئارامى. له‌م گۆشه‌یه‌ هه‌ڵوه‌سته‌ له‌سه‌ر هه‌ندێ سزاى دارایى و جۆره‌كه‌ى ده‌كه‌م كه‌ دانیشتوان ناچار ده‌كا خۆپارێزى بكه‌ن.

خانمە پۆلیسێک سزا بۆ شوفێرێک دەنوسێ کە ئۆتۆمبێلەکەی لە شوێنێکی قەدەغە راگرتووە

له‌ هه‌ندێ باردا غه‌رامه‌ سروشتێكى تایبه‌تى هاندانى تیایه‌، كه‌سى سه‌رپێچیكار ناچار ده‌كا كه‌ په‌له‌ بكا له‌وه‌ى پاره‌كه‌ بدات. له‌ هه‌ندێ كه‌یسى به‌رچاودا مۆڵه‌تێكى چه‌ند رۆژى ده‌درێ به‌ كه‌سى سه‌رپێچى كار كه‌ ئه‌گه‌ر سزا داراییه‌كه‌ له‌و ماوه‌یه‌ بدا نیوه‌ى پاره‌كه‌ ده‌دا به‌ پێچه‌وانه‌وه‌ ده‌بێته‌ دوو قات. بۆ نمونه‌ دۆستێك میوانى ئێمه‌ بوو، له‌ به‌رده‌م ماڵى ئێمه‌ ئۆتۆمبێله‌مه‌ى ( له‌ خه‌بات به‌ هه‌ڵه‌ نوسراوه‌ شوفێره‌كه‌ى - ببه‌خشن) راگرت، چونكه‌ مۆڵه‌تى راگرتنى نه‌بوو 90 پاوه‌ند سزاى بۆ نوسرا، له‌ كاغه‌زه‌كه‌ نوسرابوو ئه‌گه‌ر له‌ ماوه‌ى 14 رۆژدا سزاكه‌ بده‌یت ده‌بێته‌ نیوه‌ ده‌نا پاش ئه‌و ماوه‌یه‌ سزاكه‌ ده‌بێته‌ ده‌بڵ. له‌م باره‌دا كه‌سه‌كه‌ هه‌رچه‌نده‌ له‌ رووى داراییه‌وه‌ زیان ده‌كا، به‌ڵام به‌ مه‌منونیه‌وه‌ په‌له‌ ده‌كا له‌وه‌ى سزاكه‌ بدا. 

سزاكان به‌ تایبه‌ت ئه‌وانه‌ى په‌یوه‌ستن به‌ بوارى هاتوچۆوه‌ زۆر توند و ترسناكن، پاره‌یه‌كى زۆر و مه‌ترسى لێسه‌ندنه‌وه‌ى مۆڵه‌تى شوفێرى، جه‌نابى شوفێر ناچار ده‌كه‌ن كه‌ له‌به‌ر خاترى گیرفانى خۆى و مۆڵه‌ته‌كه‌ى خۆپارێزێ بكا. بۆ نمونه‌ ئه‌و شوفێره‌ى تازه‌ مۆڵه‌تى وه‌رگرتبێ له‌ ماوه‌ى دوو ساڵدا دوو جار له‌ ترافیك لایتى سوور بدا ( هه‌ر جارێك سێ خاڵ وه‌كو سزا ده‌چێته‌ سه‌ر مۆڵه‌ته‌كه‌ى ) سزایه‌كى دارایى گه‌وره‌ ده‌كرێ و مۆڵه‌تى شوفێرى لێ ده‌سه‌ندرێته‌وه‌. تێپه‌رِبوون له‌و خێراییه‌ى داندراوه‌ 100 پاوه‌ند سزاى داراییى و سێ خاڵ سزا ده‌چێته‌ سه‌ر مۆڵه‌ته‌كه‌ت. ئه‌مانه‌ به‌شێكن له‌و هۆكارانه‌ى شوفێرى كردنیان له‌م وڵاته‌ زۆر خۆش و به‌ له‌زه‌ت كردووه‌ ( گۆشه‌یه‌كى تایبه‌ت له‌ ئاینده‌ له‌سه‌ر ئه‌م بابه‌ته‌ ده‌نووسم). نمونه‌یه‌كى دیكه‌ كه‌ جێگه‌ى چاولێكردنه‌ په‌یوه‌سته‌ به‌ ئاماده‌بوونى منداڵ له‌ قوتابخانه‌، لێره‌ قوتابخانه‌ به‌ گوێره‌ى قانون بۆ ئه‌و منداڵانه‌ى له‌ ته‌مه‌نى پێنج - تا شانزه‌ ساڵین به‌ ناچارییه‌- ئیجبارى Compulsory school age، له‌و ته‌مه‌نه‌ دایك و باوك به‌رپرسیارن كه‌ منداڵه‌كانیان رۆژانه‌ له‌ كاتى دیاریكراو ببه‌نه‌ قوتابخانه‌ و دواتر له‌ كاتى دیاریكراو وه‌ریانبگرنه‌وه‌، به‌ پێچه‌وانه‌وه‌ بۆ هه‌ر رۆژێك نه‌چوونه‌ قوتابخانه‌ به‌ بێ هۆكار و ئاگاداركردنه‌وه‌ و مۆڵه‌ت وه‌رگرتن ( هه‌ڵبه‌ت به‌ گوێره‌ى قانون هه‌ر منداڵێك بۆى هه‌یه‌ 5 رۆژ له‌ ساڵێك وه‌كو مۆڵه‌ت وه‌ربگرێ جگه‌ له‌ نه‌خۆش كه‌وتن و بارى نائاسایی ) دایك و باوك سزاى دارایی ده‌ده‌رێن. وه‌كو له‌ رێنماییه‌كانى سزا له‌ سیستمى په‌روه‌رده‌ ساڵى 2012 هاتووه‌ كه‌ هه‌ر رۆژێك نه‌چوونه‌ قوتابخانه‌ سزاى 60 پاوه‌ند بۆ خانه‌واده‌كه‌ ده‌برِێته‌وه‌ و ده‌بێ ئه‌م برِه‌ پاره‌یه‌ له‌ ماوه‌ى 21 رۆژدا بدرێ، به‌ پێچه‌وانه‌وه‌ ده‌بێته‌ 120 پاوه‌ند و ئه‌وه‌ش ده‌بێ له‌ ماوه‌ى 28 رۆژدا بدرێ به‌ پێچه‌وانه‌وه‌ دایك و باوكه‌كه‌ ده‌درێنه‌ دادگا. له‌مه‌شدا دیسان خاسیه‌تى هاندان هه‌یه‌. نمونه‌یه‌كى دیكه‌ شوفێرى كردنه‌ به‌ سه‌رخۆشى، ئه‌گه‌ر ده‌ستگیربكرێی كه‌ شوفێرى ده‌كه‌یت و سه‌رخۆشى ئه‌م سزایانه‌ هه‌یه‌ (شه‌ش مانگ به‌ند كردن، تا 5000 پاوه‌ند سزاى دارایى، لێ سه‌ندنه‌وه‌ى مۆڵه‌ت بۆ ماوه‌ى یه‌ك ساڵ - ئه‌گه‌ر له‌ ماوه‌ى ده‌ ساڵدا دووباره‌ى بكه‌یته‌وه‌ سێ ساڵ مۆڵه‌تت لێ ده‌سه‌ندرێته‌وه‌). سه‌رنجتان بۆ ئه‌وه‌ راده‌كێشم كه‌ ئه‌و سزایانه‌ هه‌ر له‌سه‌ر كاغه‌ز نین، به‌ڵكو ساڵانه‌ سه‌دان هه‌زار پاوه‌ند بۆ حكومه‌ت دێنن. لێره‌دا پێشنیار ده‌كه‌م كه‌ سزاى خاڵ و لێ سه‌ندنه‌وه‌ى مۆڵه‌تى شوفێرى له‌ كوردستان دابهێندرێ.

hmerany@yahoo.com

 * گۆشه‌یه‌كى هه‌فتانه‌ى 500 وشه‌ییه‌ و یاده‌وه‌رییه‌كانى نوسه‌ره‌ له‌ به‌ریتانیا، له‌ رۆژنامه‌ى ئازیزى خه‌بات بڵاو ده‌بێته‌وه‌. ئه‌م گۆشه‌یه‌ له‌ ژماره‌ 4465 ى رۆژى پێنج شه‌مه‌ 19ى دیسه‌مبه‌رى 2013 له‌ لاپه‌ره‌ 7 بڵاوكراوه‌ته‌وه‌

دەست بە کارەباوە بگرن بەڵام نەتانگرێ!

هێمن میرانی

هاوڕێی دێرینم کاک رەحیم رەزگەیی ئەم پێشنیارە جوانەی بۆ کردووم. من بە تەواوی پشتگیری ئەمە دەکەم و لەوەتەی لە بەریتانیاش دەژیم باشتر تێ گەیشتووم کە ئێمە لە کوردستان نازانین نە ئاو نە کارەبا بەکار بێنین. زۆر نامەسئولانە رەفتاری پێوە دەکەین و بە فیڕۆی دەدەین.

بەڵام ئایا ئەمە بە تەنیا خەتای خەڵکە، نەخێر!
بۆچی:
١. چونکە سیستمێکی دیاریکراو و گونجاو بۆ خەرج کردنی کارەبا و پارەوەرگرتن بە گوێرەی خەرجی دانەندراوە. واتە تا ئەم دواییەش ئەوەی تەنیا دوو ژوور و هەیوانێک و سێ گڵۆپی و سەلاجەیەکی مۆدێل کۆنی هەبوو لە گەڵ ئەوەی هەژدە سپلیت و سێ بۆیلەر و بە سەدان گلۆپی جۆراوجۆری لە ڤێلا و خانوەکەی هەبوو وەکو یەک حسابیان بۆ دەکرا.
٢. ئەوانەی کارەبای زیاد خەرج دەکەن و پارە نادەنە دەوڵەت خەڵکی سادە نین، چونکە ئەو حکومەتە خۆماڵیە بۆ خەڵک زۆر دەست درێژ و ئازایە. ئەوانەی مەزرەعە و ڤێلا و کۆمپانیای جۆراجۆر و فیدەری تایبەتی کارەبایان بەشی چەند گەرەک بۆ چووە هاوڵاتی سادە نین!

٣. ئەوانەی کارەبای فولیان بۆ راکێشراوە خەڵکی سادە نین، ئەو هەموو بارەگا و دامودەزگایەی کارەبای فولیان هەیە دەبێ پارە بدەن و کارەبا کەم بکەنەوە. ئایا ئەمە دەکەن ؟
٣. لە هەموو دونیا قانون و رێنمایی ژیان رێک دەخەن، لێرەش وایە پارەی کارەبا و غاز نەدەی، شکاتت لێ دەکەن. لە لای خۆمان حکومەت دەبێ ژیان رێک بخا. چەندین ساڵە ئەو کێشەیە هەیە و دەبوایە خەڵک لەسەر دەست گرتن بە کارەبا و ئاو پەروەردە بکرێ، ئەمەش هەندێکی بە قانون دەکرێ و هەندێکیشی بە خەسڵەتی جوانی سەرکردە و سیاسیەکان کە خۆیان وەکو خەڵک کارەبایان هەبێ و دەستی پێوە بگرن. نە قانونەکە هەیە و نە خەسڵەتە جوانەکە.
٤.
بۆیە بە تەواوی پشتگیری ئەوە دەکەم کە دەبێ خەڵک هاوکاری دەوڵەت بکا دەنا بەو حاڵەی ئێستا هەگیز کێشەی کارەبا چارەسەر نابێ. بەڵام هاوکاریەکە تەنیا ئەوە نیە کە من لە خۆمەوە بیکەم، دەبێ ئەمە رێک بخرێ و بۆ هەموان وەکو یەک بێ.

یاده‌وه‌رییه‌كانى ئینگلیستان

به‌شى ناوخۆیی

هێمن میرانى 

له‌ كوردستان به‌شى ناوخۆیی له‌ لایه‌ن زانكۆوه‌ بۆ قوتابیان دابین ده‌كرێ، به‌شه‌ ناوخۆییه‌كانى كورِان و كچان نارِواننه‌ سه‌ر یه‌كترى، به‌ڵكو هى كچان هه‌میشه‌ دیواره‌كانیان به‌رزتره‌، پرسگه‌ و پۆلیسه‌كانیان ده‌بێ توندتربن. له‌و كه‌شه‌وه‌ هاتینه‌ ناو دونیایه‌كى 

دیكه‌. به‌شى ناوخۆیی لێره‌ پره‌ له‌ شتى نامۆ و نوێ بۆ ئێمه‌ى رۆژهه‌ڵاتى. 

جارێ هه‌ر له‌وه‌ ده‌ست پێ بكه‌ كه‌ نه‌ پرسگه‌ هه‌یه‌ و نه‌ حه‌ره‌س، ئه‌وه‌ى هه‌یه‌ ئۆفیسێكى پۆلیسه‌ كه‌ پۆسته‌كانى قوتابیان دێته‌ ئه‌وێ، هه‌روه‌ها بۆ بارێكى له‌ ناكاو یان پێداویستیه‌كى ئه‌منى په‌ناى بۆ ده‌بردرێ.كچ و كورِ به‌ یه‌كه‌وه‌ن و هه‌ر یه‌كه‌ و ژوورى خۆى هه‌یه‌، له‌ هه‌ندێ شوێن چێشتخانه‌ى هاوبه‌ش هه‌یه‌ بۆ پێنج تا هه‌شت  قوتابی و له‌ هه‌ندێ شوێنى دیكه‌ ته‌نانه‌ت حه‌مام و تۆیلێتش هاوبه‌شه‌. ئێمه‌ وا فێر نه‌بووین كه‌ هه‌موو شتمان تێكه‌ڵ بێ، بۆیه‌ لایه‌نى كه‌م ئه‌و به‌شه‌ ناوخۆییانه‌مان هه‌ڵبژارد كه‌ ژوورى نوستن و حه‌مام و تۆیلێتى سه‌ربه‌خۆى خۆتت هه‌یه‌ و ته‌نیا چێشتلێنانمان هاوبه‌ش بوو. ئه‌و شوقه‌یه‌ى منى تیا ژیام كورِێكى چاینى و كورِێكى ئینگلیز و من و پێنج كچى ئینگلیزى لێ بوو. هه‌موویان قوتابى زانكۆ بوون ته‌نیا من نه‌بێ كه‌ بۆ خوێندنى باڵا هاتبووم. وێرِاى ئه‌وه‌ى من هه‌رزه‌كار نه‌بووم، بایى ئه‌وه‌ ناو خه‌ڵك و كه‌شى جۆراوجۆرم دیبوو، به‌ڵام راهاتن له‌گه‌ڵ ئه‌و تێكه‌ڵیه‌ كه‌ هه‌موو شتێكى نامۆ بوو، كاتى ویست. هه‌ر له‌ چوونه‌ چێشتخانه‌ و خواردن دروست كردنه‌وه‌ بگره‌ جیاواز بوو تا شته‌كانى دیكه‌.

دیمەنێک لە چێشتخانەی بەشە ناوخۆییەکەمان لە گەڵ هەندێ لە فلات مەیتەکان

 من فێرنه‌بوو بووم كه‌ خواردن ته‌نیا بۆ خۆم دروست بكه‌م، له‌ راستیدا نه‌مده‌زانى هیچ دروست بكه‌م، یان كاتێك خواردنم له‌ به‌ر ده‌م بێ فه‌رموو له‌و كه‌سانه‌ نه‌كه‌م كه‌ له‌ چوارده‌ورى منن، له‌ كاتێك ئه‌و شته‌ به‌ ته‌واوى نامۆبوو به‌ كولتورى ئینگلیزه‌كان و كورِه‌ چاینیه‌كه‌ش. تا ماوه‌یه‌ك منیش راهاتم كه‌ خواردن بۆ خۆم دروست بكه‌م و فه‌رموویان نه‌كه‌م، هه‌رچه‌نده‌ له‌سه‌ر ئه‌وه‌ش رامهێنان كه‌ ماوه‌ ماوه‌ یه‌كترى بۆ خواردنى هاوبه‌ش ده‌عوه‌ت بكه‌ین. خاڵێكى دیكه‌ كه‌ سه‌ره‌تا بۆ من نامۆبوو ئه‌وه‌ بوو كه‌ ئه‌و كچانه‌ هه‌ر یه‌كه‌یان دۆستى خۆى Boyfriend ى هه‌بوو ( له‌ گۆشه‌كانى داهاتوو به‌ وردى جۆره‌كانى په‌یوه‌ندى و ژیانى كۆمه‌ڵایه‌تى باس ده‌كه‌م)، هه‌فته‌ى رۆژێك تا دوان ده‌هاته‌ لاى كچه‌كه‌ و له‌گه‌ڵى ده‌مایه‌وه‌ و ئیشى خۆیان ده‌كرد ( هه‌ڵبه‌ت مه‌به‌ستم سێكس كردنه‌)، سه‌یر ئه‌وه‌ بوو كه‌ هه‌ر یه‌كه‌یان له‌و به‌شه‌ ناوخۆییه‌ ژوورى خۆى هه‌بوو، واته‌ پێكه‌وه‌ش نه‌ده‌ژیان و هه‌ر یه‌كه‌یان خه‌رجى و كرێى ژووره‌كه‌ى خۆى ده‌دا. به‌ رێكه‌وت له‌ مامۆستایه‌كى خۆمم پرسى كه‌ ئه‌و جۆره‌ دۆستانه‌ بۆ نایكه‌نه‌ یه‌ك خه‌رجى و یه‌ك ژوور ناگرن؟ وه‌ڵامه‌كه‌ى زۆر نامۆ بوو بۆ من، گوتى ئاخر ئه‌وان نایانه‌وێ ئه‌وه‌نده‌ تێكه‌ڵى یه‌كترى بن كه‌ دواتر نه‌توانن جیا ببنه‌وه‌، هێشتا بۆ په‌یوه‌ندى جددى زووه‌! هه‌ر كاتێك یه‌كێكیان گوتى باى، ئه‌وه‌ى دیكه‌ جگه‌ له‌ باى چى دیكه‌ى له‌ ده‌ست نایه‌ و زۆریش به‌ ئاسایی وه‌رى ده‌گرێ. زۆرى نه‌برد وا ده‌رچوو، پاش ته‌واوكردنى خوێندن، دوو له‌و كچانه‌ ستاتیوسى خۆیان له‌ فه‌یس بوو له‌ In a relationship ه‌وه‌ گۆرِى بۆ Single چونكه‌ له‌ دۆسته‌كانیان جیاببوونه‌وه‌ و هه‌ر كه‌س چووبووه‌ رێى خۆى.

رێزگرتنى تایبه‌تمه‌ندى یه‌كترى یه‌كێك بوو له‌ خه‌سڵه‌ته‌ هه‌ره‌ جوانه‌كانى ئه‌و قوتابیانه‌ى له‌گه‌ڵ من بوون، هه‌ڵبه‌ت ئه‌مه‌ زۆر بایه‌خى پێ ده‌درێ، به‌ پرس كردن نه‌بوایه‌ یه‌ك مڵاكیشیان به‌كار نه‌ده‌هێنا، ئه‌وه‌ بۆ خواردن و پێداویستیه‌كانى دیكه‌ هه‌رگیز داوایان نه‌ده‌كرد.

hmerany@yahoo.com

گۆشەیەکی هەفتانەیە و هەموو چوارشەمەیەک لە رۆژنامەی خەبات بڵاو دەبێتەوە، ئەم گۆشەیە لە ژمارە ٤٤٥٩ ی چوارشەمە ١١ ی دیسەمبەری ٢٠١٣ لە لاپەڕە ٧ ی کاروباری کوردستان بڵاوکراوەتەوە.

ئەمە لینکی بابەتەکەیە لە خەبات:

http://xebat.net/attachment/PDF/7_26352_19588.pdf

نابێ بێ دەنگ بین

هێمن میرانی

پیاوکوژان لە ناڕەزاییەکانی خەڵک بەرامبەر بە تیرۆرکردنی سۆران مامە حەمە و سەردەشت عوسمان دەرسیان وەرنەگرت، بۆیە دەبێ خەڵک خۆی سنوورێک دابنێ. خەڵک دەبێ ئەو دەسەڵاتە ناچار بکا کە واز لە تاوانی سیاسی بێنێ و خۆی یەکسان نەکا بە رژێمە سەرکوتکارە بێ چارەنووسەکانی ناوچەکە.
پێم وایە دەبێ دۆسیەی کاوە گەرمیانی بکرێتە سەرەتایەکی نوێ لە کوردستان.

من دژی توندوتیژیم بە هەموو جۆرێک، هانی کەس نادەم توندوتیژی بنوێنێ، بەڵام نابێ بێ دەنگ بین ...
سەرەتایەکی باشە کە بەرپرسە دیارەکانی یەکێتی هاتونەتە سەر خەت و بە توندی قسە دەکەن، بەڵام ئەوەندە بەس نیە. خەڵک دەبێ فشار بکات بۆ ئەوەی سنوورێک بۆ تاوانی سیاسی بکەر نادیار دابندرێ و لە تیرۆرکردنی کاوەوە تاوانکار نەشاردرێتەوە...
نامەوێ وەکو خەڵک حوکم بدەم و تۆمەت بۆ کەس هەڵبەستم، بەڵام هەموو خەڵک دەڵێ هێشتا دوو ناوچەی نفوز لە کوردستان هەیە. چۆن تاوانی تیرۆرکردنی سەردەشت بەرپرسیاریەتیەکەی لە گەردنی پارتیە و نابێتەوە، لایەنی کەم چونکە لە ناو رۆحی دەسەڵآتی پارتی ئەنجامدرا و تا ئیستاش دۆسیەکە بە کراوەیی هێڵدراوەتەوە. ئەو تاوانانەی لە چەند مانگی رابردوو لە سنووری ئیدارەی پێشووی سەوز کراون بەرپرسیارێتی لە گەردنی یەکێتیە و ئەو حزبە لە بەردەم وێستگەیەکی مێژوویی زۆر هەستیارە.
ئەو جۆرە تاوانانە هیچ واتایەک بۆ دامودەزگا و حکومەتداری و قانون و دادگا ناهێڵنەوە، بە تایبەت کە دامودەزگا پەیوەنددارەکان بە چەند بەیانێک کۆتایی بە دۆسیەکە دێنن و پیاوکوژەکانیش وەکو بکەری ناسنامە نادیار دەمێننەوە.
ساتی ئەنجامدانی ئەو تاوانانەی لەو ماوەیە ئەنجامدراون هێما و ئاماژەی زۆر مەترسیدارن، بە تایبەت کە ئەنجامەکانی هەڵبژاردن جۆرە گۆڕانکاریەکی سیاسی لە هاوکێشەکان هێنایە پێش. مرۆڤ دەترسێ کە ئارامی و ئۆقرەیی یەکسان کرابێ بە مانەوەی پارتی و یەکێتی پێکەوە لە حوکم، هەر ئەوان مەترسیان کەوتە سەر ئیدی هەموومان بکەوینە بەر مەترسی، لە کاتێک هیچ حزبێک و لە هیچ شوێنێکی دونیا بۆ ئەوە لە گۆڕەپانەکە نیە کە تا سەر لە حوکم بێ.
دۆستان:
متمانەی منی هاوڵاتی بە دامودەزگاکانی نیشتیمانی خۆم دێتە خوارەوە کە دەبینم قانون تەنیا بۆ هەژاران و بێ نەوایان دەست درێژ و سەروەرە و بۆ ئەوانەی کە دەنگی جیاوازیش دەسڕنەوە قانون و حکومەت بێ دەسەڵات و بێ کردارن. نامەوێ پێش لێکۆڵینەوەکان بکەوم، بەڵام ئەزموونەکانی پێشوو ئەوەمان پێ دەڵێن.
بە ناڕەزایی هێمنانە و دەنگ بەرز کردنەوە دەبێ هەموومان دەسەڵآتی خۆماڵی ناچار بکەین کە ئایندەی وڵآتەکەمان بە قوربانی بەرژەوەندی سیاسی گروپە مافیاییەکان نەکا.
کاک مەلا بەختیار ئاسا گوتەنی " كاوە تیرۆرستی عەرەب شەهیدیان نەكردووە، لەسەر كێشەیەكی شەخسی‌و عەشایەریش تیرۆر نەكراوە، كەوابێت "تیرۆكردنەكەی لەسەر قەڵەم‌و ئازادییە"، هەرچەندە ئەو بڕیارە دەبێ دادگا بیدا، بەڵام بە داخەوە من وەکو هاوڵاتیەکی ئاسایی هیچ متمانەم بە دادگا و قانون لە وڵآتی خۆم نیە، پێم ناخۆشە کە وا دەڵێم، بەڵام قانون بەس بۆ خەڵکی خوارەوە هەیە. قانون خۆی ئەو وێنەیەی لەبەرچاوی من لەسەر خۆی دروست کردووە، یەک دۆسیەی تاوانی سیاسی نیە کە بکوژەکانی دەستگیر کرا بن.
بۆیە خەڵک دەبێ فشار بکا، هێزە کۆمەڵایەتی و نوسەر و کەسە ئاکادیمیەکان دەبێ بێ دەنگ نەبن، چونکە ئەم تاوانانە ئاماژە سەرەتاکانی قۆناغێکی زۆر مەترسیدار و تاریکن لە وڵاتەکەمان.
وێنە: لە سایتی شار پرێس وەرگیراوە