دیسان دەربارەی سەرۆکایەتی هەرێم
هێمن میرانی
دوو بابەت لە میدیای کوردی زۆر خراپ تێکەڵ کراون و تەنانەت هەندێ سیاسی گەورە گەورەش کەوتونەتە ئەو هەڵەیەوە:
یەکەم: ئایا بەڕێز مەسعود بارزانی سەرۆکی ئێستای هەرێم مافی ئەوەی هەیە خۆی کاندید بکات یان شایەنی ئەوەیە سەرۆک بێ، یان پیاوێکی خەباتگێڕە یان چی و چی...
دووەم: ئایا لە رووی قانونیەوە بە رەچاوکردنی قانونی سەرۆکایەتی هەرێم و بەرکارنەبوونی دەستوور، سەرۆکی ئێستا مافی ئەوەی هەیە بۆ ویلایەتی سێیەمی سەرۆکایەتی کاندید بێ یان نا؟
بە داخەوە لێدوانی هەندێ بەرپرسانی پایە بەرزی پارتی و قسەکانی کاکە حەمە و ئەو قسانەش کە یاریدەدەری ئەمینداری یەکگرتوو بۆ هەفتەنامەی باس کردویەتی دوور و نزیک پەیوەندیان بە کرۆکی ئەو کێشەیەوە نیە کە دەربارەی سەرۆکایەتی لە کوردستان هاتۆتە پێش.
سەرۆک بارزانی هاوڵآتی کوردستانە و مافی کاری سیاسی هەیە، خەباتگێڕ بووبێ یان نا ئەوە لە بابەتەکە ناگوڕێ، چونکە هەر کەس مافی خۆ پاڵاوتنی هەبوو خەباتگێڕ بێ یان نا دەتوانێ خۆی کاندید بکا و خەڵک دواجار لە هەڵبژاردن ئەو کەسە هەڵدەبژێرن کە دەیانەوێ.
بۆیە ئەو قسانەی کە دەکرێن " سەرۆک خەباتگێڕە" ، "پێویستی بە کورسی نیە بەڵکو کورسی پێویستی بە بەڕێزیانە"، "بەدیلمان نیە"، "کاک نەوشیروانیش گوتویەتی تۆ بۆ ئەم قۆناغە پێویستی"، "پارتی و یەکێتی کاندیدی دیکەیان نیە" ، و هتد...هیچ کام لەم قسانە پەیوەندیان بە دۆخە قانونیەکەوە نیە کە هەیە.
بە گوێرەی ماددەی ١٧ ی قانونی ژمارە 1 ی ساڵی ٢٠٠٥ ی سەرۆکایەتی هەرێم چوار ساڵی یەکەمی سەرۆکایەتی بەڕێز بارزانی کە لە لایەن پارلەمانەوە هەڵبژێردراوە بە ویلایەتی یەکەم دادەنرێ و ئەو بابەتە ئەوەندە روونە کە ئەوەی بڵێ راوێژی قانونی پێویستە نایەوێ لەوە تێ بگا.
( سەیر ئەوەیە ئەندامێکی لێژنەی قانونی لە پارلەمانی کوردستان لەو دەقە تێ ناگا - لە راستیدا یان ناوێرێ یان نایەوێ تێ بگا).
خولاسە:
چاوی میدیای جیهانی لەسەر کوردستانە و ئەوە نەوەدەکان نیە حزبەکان چۆنیان بوێ وا بکەن. شەرمی پێ ناوێ و پێویستیش نیە خۆتان وا پیشان بدەن کە رووبەرووی نا روونی قانونی یان دەستووری بونەتەوە. ئەگەر سەرۆک بارزانی حەزی لە چوار ساڵی دیکەیە و یان وەکو خۆتان دەڵێن پێویستە لەم قۆناغەدا بمێنێتەوە و پارتی و یەکێتی سوورن لەسەر کاندید کردنەوەی، شەرم مەکەن و بڕۆنە پارلەمان و هەر بە زۆرینە (چونکە ئۆپۆزیسیۆن رای خۆی گوت) قانوونی سەرۆکایەتی هەرێم هەموار بکەن و چانسێکی دیکەش بە گوێرەی قانوون بە سەرۆک بدەن و کاندیدی بکەن، ئەو کات خەڵکیش بڕیار دەدات کە ئەویان دەوێتەوە یان ئەگەر رکابەر هەبوو دەنگ بە رکابەرەکانی دەدەن.
ئەگەر قانوونی سەرۆکایەتی هەرێم هەموار نەکرێ و پرۆژە دەستووریش تا هەڵبژاردن لە ریفراندۆم ناجیح نەبێ، دەبێ پارتی و یەکێتی بیر لە کاندیدی دیکە بکەنەوە و بارزانی رووبەرووی کاری نا قانوونی نەکەنەوە.
شتەکان روونن و پێویست بەوە ناکا وا لە خۆتان و خەڵک بگەیەنن کە نا روونی هەیە...
www.facebook.com/hemn2011
