Sunday 10 August 2014


چ ده‌بێ له‌م رووداوانه‌ فێر بین.
 
هێمن میرانی
 
سوپاس بۆ ئازایه‌تی پێشمه‌رگه‌ و خۆڕاگری خه‌ڵک، سوپاس بۆ دۆستانمان که‌ پیشانیاندا چیتر چیاکان ته‌نیا دۆستی ئێمه‌ نین.
ئه‌م سه‌رنجانه‌م له‌ لا هه‌یه‌:
یه‌که‌م: ئه‌م شه‌ڕه‌ شه‌ڕکردن نیه‌ له‌ گه‌ڵ گروپێکی ئاسایی، بۆیه‌ با زیاتر و گه‌وره‌تر له‌ توانای خۆمان سه‌یری خۆمان نه‌که‌ین، پێشمه‌رگه‌ ناتوانێ به‌ بێ پاڵپشتی نێوده‌وڵه‌تی له‌ مه‌ودای دووردا ئه‌م شه‌ڕه‌ بباته‌وه‌، له‌ گه‌ڵ ئه‌وه‌ی پێشمه‌رگه‌کانمان ئه‌و په‌ڕی ئازایه‌تی و دڵسۆزیان پیشانداوه‌، بۆیه‌ سوپاس بۆ هاوکاری هاوپه‌یمانه‌کانمان.
دووه‌م: پاش ته‌واوبوونی ئه‌م دۆخه‌، که‌ سوپاس بۆ خوا ئاماژه‌کانی سه‌رکه‌وتنمان نزیکن، خه‌ڵکی کوردستان ده‌بێ ده‌رسێک بداته‌ ئه‌وانه‌ی حزبایه‌تی ده‌که‌ن، زۆر شوره‌ییه‌ که‌ ده‌یان هه‌زار هاوڵاتی ئێمه‌ له‌ چیاکان گیریان خواردووه‌ و رۆژانه‌ ده‌مرن، که‌چی میدیاکانی یه‌کێتی و په‌که‌که‌ له‌ لایه‌ک و میدیاکانی پارتی له‌ لایه‌کی دیکه‌ خه‌ریکن کوردایه‌تی به‌سه‌ر خه‌ڵکی برسی ده‌فرۆشن. زۆر شه‌رمه‌ ئه‌وانه‌ هێشتا خه‌ریکی ده‌ستکه‌وتی حزبین.
سێیه‌م: ئه‌مجاره‌ به‌ ته‌واوی ده‌رکه‌وت که‌ ئێمه‌ چه‌نده‌ پێویستیمان به‌ پێشمه‌رگه‌ی یه‌کگرتوو هه‌یه‌ که‌ حزبه‌کان سیاسه‌تی پێوه‌ نه‌که‌ن، ئێمه‌ چه‌نده‌ پێویستیمان به‌ هێزی نیشتیمانی ناحزبی هه‌یه‌.
چواره‌م: ئه‌مه‌ له‌ بیر نه‌که‌م که‌ زۆر ناشرینه‌ له‌ فه‌یس بووک و له‌ هه‌ندێ که‌ناڵی میدیاش دیسان ده‌کراوه‌ به‌ پاڵه‌وانکردنی هه‌ندێ به‌رپرسی سیاسی و عه‌سکه‌ری. له‌ کاتێک هه‌موومان ده‌زانین ئه‌وه‌ پێشمه‌رگه‌یه‌ به‌ هاوکاری نێوده‌وڵه‌تی هاوکێشه‌که‌ ده‌گۆرێ و هیچ به‌رپرسێکی عه‌سکه‌ری پاڵه‌وان و گولله‌ نه‌بڕ نیه‌.
تا بۆم کرابێ له‌ فه‌یس بووک و تویته‌ر داوام له‌ هاوڕێکانم کردوه‌ که‌ هه‌موو جۆره‌ گله‌ییه‌ک دوابخه‌ن بۆ کاتی خۆی، ئێمه‌ ئه‌مڕۆ هه‌موومان ده‌بێ له‌ پشت خه‌ڵک و حکومه‌ت و پێشمه‌رگه‌ی خۆمان بوه‌ستین.
من وه‌کو هاوڵاتیه‌ک که‌ به‌ داخه‌وه‌ شه‌ره‌فی ئه‌وه‌م به‌ر نه‌که‌وت که‌ له‌م دۆخه‌دا هیچ به‌شداریه‌کی راسته‌وخۆم له‌ پاراستنی کوردستان هه‌بێ، هه‌رچه‌نده‌ که‌س و کارم له‌ به‌ره‌کانی شه‌ڕن، به‌ڵام ده‌ستی یه‌که‌ یه‌که‌ی پێشمه‌رگه‌کان ماچ ده‌که‌م، پارتی بن یه‌کێتی بن یان هه‌ر حزبێکی دیکه‌، ده‌ستی یه‌که‌ یه‌که‌ی گه‌ریلاکانی YPG ماچ ده‌که‌م که‌ به‌شدارن له‌ رزگارکردنی خوشک و برا یه‌زیدیه‌کانمان له‌ چیاکانی شه‌نگار و له‌ چه‌ندین سه‌نگه‌ری به‌رگری له‌ کوردستاندا دڵسۆزی خۆیان پیشاندا.
هه‌موو حزبه‌کان و میدیاکانیان ده‌بێ بزانن خه‌ڵک کوێر نیه‌ و سه‌یری یه‌ک میدیا ناکا، ئێوه‌ ناتوانن چیتر لایه‌نی که‌م هه‌موو خه‌ڵک بگه‌وجێنن، ئه‌وه‌ ئێوه‌ن خۆتان ریسوا ده‌که‌ن له‌ کاتێک هه‌موو دونیا هاتۆته‌ هاواری کوردستان ئێوه‌ هێشتا خه‌ریکی چنینه‌وه‌ی ده‌ستکه‌وتی حزبین، ده‌بێ به‌ خۆتاندا بچنه‌وه‌.
بژی کوردستان و پێشمه‌رگه
شه‌ڕه‌كه‌ مه‌كه‌نه‌ هی‌ كورد و عه‌ره‌ب

هێمن میرانی

ئه‌و روداوانه‌ی‌ هاتونه‌ته‌ پێش، كرده‌وه‌ دڕنده‌كانی‌ داعش و هه‌ڵوێست و پاڵپشتی‌ هه‌ندێ گروپ و عه‌شیره‌تی‌ عه‌ره‌بی‌ له‌ ده‌شتی‌ هه‌ولێر به‌تایبه‌ت، نا ره‌زاییه‌كی‌ گه‌وره‌ی‌ له‌نێو خه‌ڵكی‌ كوردستان دروست كردوه‌، به‌ جۆرێك خه‌ڵك داوای‌ ده‌كردنی‌ عه‌ره‌به‌ ئاواره‌كان ده‌كا و ره‌نگه‌ لێره‌وله‌وێ هه‌ندێ هه‌ڵوێستی‌ تاكه‌كه‌سیش به‌رامبه‌ریان گیرابێته‌ به‌ر. من له‌گه‌ڵ ئه‌وه‌ی‌ به‌ ته‌واوی‌ له‌ هه‌ستی‌ خه‌ڵك ده‌گه‌م و ره‌نگه‌، به‌ هۆی‌ ئه‌وه‌ی‌ خۆم خه‌ڵكی‌ یه‌كێك له‌ گونده‌كانی‌ ده‌شتی‌ هه‌ولێرم و و باوك و باپیرانم له‌گه‌ڵ ئه‌و عه‌ره‌بانه‌ هاوگوند بونه‌ و ژیاون، باشتر له‌ زۆر له‌ خه‌ڵك له‌ ناوكی‌ ئه‌و عه‌ره‌بانه‌ی‌ ناچه‌كه‌ تێ بگه‌م، به‌ڵام به‌ گشتی‌ كردن و حوكم دان له‌سه‌ر هه‌موان و هه‌ڵوێستی‌ خراپ نواندن به‌رامبه‌ر ئه‌وانه‌ی‌ له‌ كوردستان وه‌كو ئاواره‌ داده‌نیشن، ته‌نیا زیانی‌ بۆ كوردستان هه‌یه.‌

له‌بیر نه‌كه‌ن رژێمه‌ یه‌ك له‌دوای‌ یه‌كه‌كانی‌ عێراق و ته‌نانه‌ت داعیش حه‌ز ده‌كا شه‌ڕه‌كه‌ ببێته‌ شه‌ڕی‌ كورد و عه‌ره‌ب له‌و ناوچه‌یه‌، چونكه‌ هه‌موان ده‌زانن شه‌ڕكردن له‌ گه‌ڵ تیرۆر پشتیوانی‌ نێوده‌وڵه‌تی‌ بۆ كوردستان فه‌راهام ده‌كا، به‌ڵام ئه‌گه‌ر بوه‌ شه‌ڕی‌ نه‌ته‌وه‌یی هه‌م شه‌ڕه‌كه‌ درێژخایه‌ن و پڕ زیانتر ده‌بێ، هه‌میش كورد ناتوانێ شه‌ڕێكی‌ ئاوا بباته‌وه‌، بۆیه‌ تكایه‌ خۆتان ئاو مه‌كه‌نه‌ ئاشی‌ ئه‌وانه‌وه‌.

دیسان هه‌ڵوه‌سته‌ له‌سه‌ر ئه‌وه‌ ده‌كه‌م كه‌ به‌ته‌واوی‌ له‌ نیگه‌رانیه‌كانی‌ خه‌ڵك ده‌گه‌م، ئه‌م سه‌رنجه‌شم هه‌رگیز مانای‌ ئه‌وه‌ نیه‌ كه‌ چاوپۆشی‌ له‌ هه‌مو شتێكی‌ ئاواره‌كان بكرێ، چونكه‌ بێ هیچ گومانێك ره‌نگه‌ شانه‌ی‌ خه‌توی‌ زۆر له‌نێو ئه‌و ئاوارانه‌ هه‌بن، به‌ڵام ئه‌وه‌ی‌ ده‌كرێ بكرێ ئه‌مه‌ی‌ خواره‌وه‌یه‌:

یه‌كه‌م: هێزه‌كانی‌ ئاسایش و پۆلیس زۆر به‌ چاوكراوه‌یی به‌ هاوكاری‌ خه‌ڵك چاودێری‌ وردی‌ ئه‌و ئاوارانه‌ بكه‌ن و له‌ حاڵه‌تی‌ هه‌ست كردن به‌ شتی‌ نامۆ، ده‌زگا په‌یوه‌ندداره‌كان ئاگادار بكرێنه‌وه‌ و رێوشوێنی‌ قانونی‌ له‌ دژیان بگیرێته‌ به‌ر.

دوه‌م: خه‌ڵك به‌شداریه‌كی‌ كاریگه‌ر بكا له‌ چاودێری‌ كردنی‌ ئاواره‌كان، له‌ كاتی‌ بینینی‌ شتی‌ نامۆ كه‌س له‌ خۆیه‌وه‌ هه‌ڵوێست وه‌رنه‌گرێ، به‌ڵكو ئاگاداری‌ ئاسایش و پۆلیس بكاته‌وه‌ و ئه‌ركه‌كه‌ به‌وان بسپێرێ.

سێیه‌م: من به‌ كارێكی‌ باشی‌ نابینم خه‌ڵك دیواره‌كانیان بنوسرێ و هه‌ڕه‌شه‌ی‌ ده‌كردنیان لێ بكا، ئه‌وانه‌ به‌ ره‌زامه‌ندی‌ حكومه‌تی‌ خۆمان هاتون و ته‌نیا حكومه‌ت ده‌توانێ مۆڵه‌تی‌ مانه‌وه‌یان لێ وه‌ربگرێته‌وه‌.

هه‌رچه‌نده‌ حكومه‌تی‌ كوردستان و خه‌ڵكی‌ خۆمان له‌ ژێر هه‌ڕه‌شه‌ی‌ داعش و ئابڵوقه‌یه‌كی‌ ئابوری‌ گه‌وره‌ی‌ به‌غدان و ئه‌و ئاوارانه‌ فشاره‌كه‌یان گه‌وره‌تر كردوه‌، به‌ڵام له‌ بیر نه‌كه‌ن ئێمه‌ میلله‌تێكین هێشتا ملیۆنان خه‌ڵكمان له‌ وڵاتانی‌ ئه‌وروپی‌ ئاواره‌ن، ئێمه‌ نابێ بكه‌وینه‌ ژێر كاریگه‌ری‌ هه‌ندێ روداوی‌ كاتی‌ و هه‌ڵسوكه‌وتی‌ هه‌ندێ عه‌ره‌بی‌ ناوچه‌كه‌، كه‌ بێگومان دواتر ئه‌وانه‌ش ده‌بێ لێپرسینه‌وه‌یان له‌گه‌ڵ بكرێ به‌تایبه‌ت ئه‌وانه‌ی‌ له‌ مه‌خمور و گوێر ده‌ژین و دواتر هه‌ر ده‌كه‌ونه‌وه‌ ژێر ده‌سه‌ڵاتی‌ كوردستان. به‌ڵكو پێویسته‌ خوێنده‌واران و حكومه‌ت و ره‌وه‌ندی‌ كوردی‌ له‌ رۆژئاوا له‌ڕێی‌ راكێشانی‌ سه‌رنجی‌ كۆمه‌ڵگه‌ی‌ نێوده‌وڵه‌تی‌ و شه‌قامی‌ وڵاتانی‌ رۆژئاوا بۆ راگرتن و په‌نا دانانی‌ زیاتر له‌ یه‌ك ملیۆن ئاواره‌ له‌ لایه‌ن حكومه‌تی‌ كوردستان و خه‌ڵكی‌ كوردستانه‌وه‌، هه‌وڵ بدرێ ده‌ستكه‌وتی‌ گه‌وره‌ی‌ لێوه‌ بچنرێته‌وه‌.

دیوانی وه‌زاره‌تی ناوخۆ: ئەو شوێنانەی کامێرای 'پۆینت تو پۆینت'یان تێدایە 90% رووداوی هاتووچۆ تێیاندا کەمبووەتەوە

به‌ڕێوه‌به‌ری گشتیی دیوانی وه‌زاره‌تی ناوخۆی هەرێمی کوردستان دەڵێت، "زۆرینەی تاوان و دزیکردنەکان بە ماتۆڕسکیلی بێ سەرەتا ئەنجام دەدرێن&...